Ніхто не прыйшоў на Імшу ў катэдры Магілёва. Святар выказаў свае пачуцці, а вернікі далі яму парады

Нядаўна прызначаны вікарыем катэдральнага касцёла ў Магілёве ксёндз Аляксандр Улас зафіксаваў рэдкі выпадак: ніводны вернік не прыйшоў на будзённую святую Імшу ў галоўным каталіцкім храме горада зранку 8 студзеня.

Святар на сваёй старонцы падзяліўся думкамі і пачуццямі пасля таго, як адправіў Імшу ў пустым касцёле. Адзначым, што яна была а 9-й раніцы – час, калі ў працоўны дзень амаль усе парафіяне, акрамя пенсіянераў, занятыя.

«Малітва – без адказу, слова – без слухача, холад у сэрцах», напісаў святар. Ён лічыць, што касцёл «спустошыла абыякавасць».

«Калі знікаюць вернікі, знікае ўсё, што раней падтрымлівала цябе знешне: позіркі, удзячнасць, адчуванне патрэбнасці, сама роля святара. Застаешся толькі ты і Бог. І тады адкрываецца балючая, але неабходная праўда: я служy не дзеля людскіх позіркаў, а дзеля таго, што Бог ёсць. Адчуванне безсэнсоўнасці агаляе сэрца, зрываючы ўсе маскі. Імша без людзей – гэта літургічная Гефсіманія. Хрыстус таксама застаўся адзін: вучні спалі, натоўп разышоўся, засталася толькі воля Айца. Святар, які стаіць перад пустымі лавамі, у нейкім сэнсе ўваходзіць у тую ж глыбіню адзіноты. Гэта не трыумф святарства, а яго ўкрыжаванне», – падзяліўся ксёндз.

Але ў каментарах многія вернікі з ім не пагадзіліся. Некаторыя палічылі, што святар перажывае крызіс веры, але выдае яго за крызіс веры сваёй паствы, а «гэты боль і адсутнасць вернікаў» – заклік да самога святара «выплысці на глыбіню».

«Гэта тое, што з чалавечага пункту гледжання не мае сэнсу, і не нясе ў сабе нічога пазітыўнага: ні суцяшэння, ні падтрымкі, ні прыемных адчуванняў. Але ў гэтым і ёсць сэнс: служыць на чыстай веры, якая становіцца ў такія моманты чыстай любоўю да Бога. Вы ведаеце, што людзі вас любяць. Вы ведаеце, што класна прамаўляеце. Ведаеце, што ўмееце запальваць сэрцы. А калі гэта ўсё адмінусаваць, хаця б на час? Ну тады, як казалі ў Хроніках Нарніі, "Далей уверх, далей углыб!"», – параіла адна з верніц.

Пракаментавалі сітуацыю і іншыя святары. Адзін з іх пажадаў больш давяраць Богу і глядзець на ўсё вачыма веры, а іншы – грэка-каталіцкі святар – адзначыў, што часта служыць Літургію ў адзіноце і не бачыць у гэтым нічога страшнага:

«Не прыйшлі, бо сёння на працу трэба. Нехта прыйдзе на вечаровую імшу. Я рэгулярна служу адзін, як, думаю, і шмат хто са святароў у невялікіх парафіях. Малюся за сябе, і за сваіх вернікаў – у іх праца, сем'і, хваробы, падпрацоўкі. А мой абавязак – маліцца. Матывую іх, канечне, але стараюся радавацца калі нехта прыходзіць на Літургію, а не ўпадаць у роспач, калі не прыходзіць».

Таксама ў каментарах адзначылі, што і ў невялікіх праваслаўных прыходах часта ўзнікае падобная сітуацыя.

Наш канал в Telegram – только интересное и важное. Подписаться >