Уратавалі ад інфаркту. Арцыбіскуп Кандрусевіч выпісаны са шпіталя пасля аперацыі на сэрцы

Жнівень 12, 2026
Written by KATOLIK.LIFE
Published in Царква
Add new comment

Пасля паляпшэння стану 80-гадоваму іерарху выканалі новую аперацыю на сэрцы.

Арцыбіскуп эмэрыт Тадэвуш Кандрусевіч пасля працяглага знаходжання ў лякарні ў Мінску з-за праблем з сэрцам выпісаны з лячэбнай установы. Як мы распавядалі, заслужанага іерарха давялося шпіталізаваць пасля пагаршэння самаадчування.

Сітуацыя была сур'ёзнай, але лекары своечасова выявілі сардэчную недастатковасць і прадухілілі новы інфаркт (раней арцыбіскуп ужо пераносіў інфаркт).

Цяпер вернікі даведаліся, што пасля паляпшэння стану 80-гадоваму іерарху выканалі аперацыю на сэрцы: усталявалі новыя стэнты і прачысцілі старыя. Гэта не складаная працэдура на сасудах сэрца, але ў ягоным узросце яна магла несці пэўную небяспеку. Аднак іерарх, за якога працягваюць маліцца вернікі, паспяхова перанёс аперацыю.

Цяпер ён знаходзіцца на рэабілітацыі. Нагадаем, акрамя праблем з сэрцам заслужаны іерарх мае анкалагічную хваробу, з рэцыдывам якой змагаецца ўжо амаль паўтара года.