Дзве сястры з Беларусі склалі вечныя шлюбы ў ордэне, пра які вы маглі не ведаць

Жнівень 13, 2026
Written by KATOLIK.LIFE
Published in Царква
Add new comment

Служэнне ў Беларусі манахіні гэтага ордэну пачыналі ў Слуцку, дзе працуюць і цяпер.

У Польшчы дзве дзяўчыны з Беларусі склалі вечныя шлюбы (канчатковае і пажыццёвае прысвячэнне сябе Богу) у каталіцкім манаскім ордэне ядвіжанак. Гэты ордэн не так шырока вядомы, як іншыя, а яго поўная назва — Кангрэгацыя сясцёр святой Ядвігі ад Беззаганнай Багародзіцы Панны Марыі (княгіні Сілезскай).

Сястра Валерыя і сястра Тэрэса ўрачыста склалі вечныя шлюбы і неўзабаве пачнуць служэнне ў Слуцку і Асіповічах, паведамілі ў беларускім пабліку ядвіжанак. Сёстры гэтага ордэна ўпершыню прыехалі ў Беларусь больш за 30 гадоў таму з Польшчы і сталі служыць у Слуцку: працаваць з дзецьмі і моладдзю ў мясцовай парафіі, а затым і ў іншых гарадах.

Зараз, мяркуючы па свежым фота, у Беларусі служаць каля дзесяці ядвіжанак. Цікава, што раней менавіта з парафіі ў Слуцку больш за дзесяць дзяўчат уступілі ў ордэн, натхніўшыся прыкладам жыцця сясцёр, якія прыязджалі служыць у парафіі. Дэвіз ядвіжанак: шчаслівыя міласэрныя.