Ілюстраваная гісторыя «Краіна Беларусь» будзе перададзена Святому Айцу
- Written by katolik-gomel.by
- Published in Царква
- Add new comment
Беларускі гісторык і пісьменнік Уладзімір Арлоў, вернік грэка-каталіцкай парафіі Праведнага Язэпа ў Мінску, перадаў Апостальскаму Нунцыю ў Беларусі арцыбіскупу Клаўдыё Гуджэроцці англійскую версію сваёй вядомай кнігі, iлюстраванай гісторыі “Краіна Беларусь” (“This country called Belarus”, аўтар тэксту - Уладзімір Арлоў, мастак - Зміцер Герасімовіч), як падарунак для Папы Францішка.
Гэта адбылося 30 жніўня 2014 г., у дзень малітоўнага ўспаміну біскупа Чэслава Сіповіча, у капліцы Душпастырскага цэнтра парафіі Праведнага Язэпа перад Архіерэйскай Літургіяй, якую ўзначаліў дапаможны біскуп Прэшаўскай грэка-каталіцкай архіепархіі (Славакія) Мілан Лях.
Апостальскі Нунцый з удзячнасцю прыняў гэты падарунак, благаславіў Уладзіміра Арлова і яго жонку — паэтэсу і журналістку Валянціну Аксак — на творчую працу і запэўніў, што перадасць кнігу асабіста Святому Айцу ў дзень сустрэчы з ім, 25 верасня.
Паводле svjazep.org