Гомельскія каталікі моляцца аб выдзяленні ў Савецкім раёне зямлі пад будаўніцтва храма

З гэтага часу ў Гомелі афіцыйна дзейнічаюць тры рыма-каталіцкіх парафіі. Гомельскі аблвыканкам на днях зарэгістраваў парафію Успення Божай Маці. Роўна 75 гадоў таму гэтую парафію знішчылі бальшавікі і разбурылі каталіцкі сабор, які знаходзіўся ў раёне цяперашняй плошчы Леніна. Сімвалічна, што цяпер парафію адрадзілі ў Савецкім раёне Гомеля.

Падчас Пасхальнага Трыдуума біскуп Казімір Велікаселец памаліўся аб тых дзяржаўных службоўцах, якія спрыялі рэгістрацыі новай парафіі. Таксама біскуп прасіў Госпада аб станоўчым рашэнні мясцовых уладаў з нагоды выдзялення зямельнага ўчастка пад будаўніцтва храма. Маліцца аб гэтым біскуп Казімір папрасіў і ўсіх вернікаў.