Праз 70 год у Гомелі адрадзілі знішчаную бальшавікамі каталіцкую парафію [фота]

15 жніўня, у свята Ўнебаўзяцця Найсвяцейшай Панны Марыі першая святая Імша прайшла ў аднайменнай гомельскай рыма-каталіцкай парафіі. Прастольнае свята правёў пробашч новай парафіі, дапаможны біскуп Пінскай дыяцэзіі айцец Казімір Велікаселец.

Парафія Ўнебаўзяцця Найсвяцейшай Панны Марыі існавала ў Гомелі яшчэ з царскага часу, але ў 1940-м годзе касцёл у цэнтры горада ўзарвалі бальшавікі. Па ініцыятыве біскупа Казіміра знішчаную парафію аднавілі ў Савецкім раёне Гомеля. Улады ўжо далі дазвол на будаўніцтва новага каталіцкага храма на Рэчыцкім праспекце паміж Гомельскім дзяржаўным політэхнічным універсітэтам імя Сухога і Давыдаўскім рынкам, паведамляе katolik-gomel.by.

Урачыстая Імша прайшла ў будынку пакуль адзінага ў Гомелі касцёла на вуліцы Савецкай. Вернікі маліліся аб будаўніцтве новага храма і прайшлі Хросным ходам з рэліквіямі святой Тэрэзы ад Дзіцяткі Езуса.

- І так мы дабраславім гэты горад, дзе так шмат атэістаў, няверуючых людзей, якія яшчэ не знайшлі Ісуса Хрыста і не ведаюць, што не хлебам адзіным жывы чалавек, што жыццё наша скончыцца не смерцю, а ўваскрасеннем, - сказаў біскуп Казімір. - Небаўзяцце Божай - гэта ўзнагарода за тое, што Яна перажыла разам са сваім Сынам.