Прадстаўнік МЗС на сустрэчы ў Гомелі: адносіны з Ватыканам развіваюцца ў пазітыўным ключы

25 лютага ў Гомельскім дзяржаўным універсітэце імя Францыска Скарыны прайшла сустрэча студэнтаў і выкладчыкаў ВНУ з першым намеснікам міністра замежных спраў Беларусі Аляксандрам Міхневічам. На пытанне, зададзены дыпламату прадстаўніком каталіцкай супольнасці аб развіцці адносін з Ватыканам і магчымым візіце ў Беларусь Папы Рымскага Францішка, прадстаўнік МЗС адказаў:

- Адносіны з Ватыканам у нас стабільныя, яны развіваюцца ў пазітыўным ключы, там дзе трэба, на трэціх пляцоўках, мы знаходзім падтрымку у Святога Прастола. Што тычыцца візіту Папы Рымскага ў Беларусь, то як для любога візіту такога высокага ўзроўню, павінен быць падрыхтаваны адпаведны пакет дзеянняў. Калі гэты пакет будзе гатовы, я ўпэўнены, што Папа Рымскі да нас прыедзе, улічваючы, што каталіцкае насельніцтва ў нас шырока прадстаўлена.

Нагадаем, напярэдадні ў МЗС адбылася сустрэча Міністра замежных спраў Беларусі Уладзіміра Макея з Апостальскім Нунцыем у Беларусі арцыбіскупам Клаўдыё Гуджэроцці. Падчас сустрэчы былі абмеркаваны бягучыя пытанні адносін Беларусі і Ватыкана. Абмяркоўваліся таксама перспектывы развіцця ўзаемадзеяння паміж Беларуссю і Ватыканам у галінах, якія ўяўляюць цікавасць для абодвух бакоў.