«Мір у душах - мір у грамадстве». Арцыбіскуп Кандрусевіч параіў, як вырашыць крызіс у Беларусі
- Written by KATOLIK.LIFE
- Published in Соцыум
- Add new comment
Ужо больш за месяц каталіцкі арцыпастыр знаходзіцца ў выгнанні з-за таго, што яго незаконна пазбавілі права вярнуцца ў краіну
Фігура святога Арханёла Міхала, заступніка Каталіцкай царквы ў Беларусі, прыбыла ў Магілеў, і з гэтый нагоды арцыбіскуп Тадэвуш Кандрусевіч, які цяпер знаходзіцца ў выгнанні, з Бельска Падляскага скіраваў слова да вернікаў рэгіёна. Арцыпастыр нагадаў, што прычынай цяжкага крызісу, які ўжо другі месяц перажывае Беларусь, з’яўляецца грэх - першапрычына ўсіх падзелаў і непаразуменняў.
- Час ідзе, а крызіс працягваецца. Розныя прапановы яго вырашэння не прыносяць жаданага выніку. Пры гэтым мы забываемся пра стары выраз: «Без Бога - ні да парога». Хрыстус таксама выразна вучыць, што без Яго мы нічога не зробім. Таму, разам з чалавечымі намаганнямі неабходна прасіць Божай дапамогі ў гэты час выпрабаванняў, з якімі сутыкнулася наша нацыя, - цытуе іерарха Catholic.by.
Сваёй пастве, якая засталася без пастыра, арцыбіскуп дае духоўную параду для таго, каб мір і згода зноў вярнуліся на родную зямлю:
- Сёння мы скіроўваем свой позірк на святога арханёла Міхала - пераможцу злога духа. Нам неабходна тэрмінова вызваліцца ад панавання злога духа ў нашых сэрцах, а гэта магчыма праз малітву, пакаянне і ўзаемнае прабачэнне, якія вяртаюць духоўны супакой. Умовай міру ў грамадстве з’яўляецца мір у нашых душах. Таму перш за ўсё малітва, навяртанне і прабачэнне павінны паспрыяць вырашэнню грамадска-палітычнага крызісу ў нашай краіне, - падкрэсліў арцыпастыр, яшчэ раз заклікаўшы да шчырага дыялогу ўсе бакі канфлікту.
Як адзначыў арцыбіскуп, «нас, такіх розных, так шмат аб’ядноўвае»:
- Супольная багатая і адначасова трагічная гісторыя нашага народа, які нават з вельмі небяспечных выпрабаванняў выходзіў пераможцам. Мы ганарымся сваёй культурай, якая займае пачэснае месца ў сусветнай культурнай спадчыне. Наша нацыя вырасла з хрысціянства, якое прыняла больш за 1000 гадоў таму. А хрысціянства - гэта рэлігія супакою і мірнага суіснавання. У нас вельмі добрыя міжхрысціянскія адносіны, асабліва паміж католікамі і праваслаўным. Мы таксама можам ганарыцца добрымі міжрэлігійнымі адносінамі. Усё гэта - наш супольны набытак і ён дарагога варты.
Беларускі арцыпастыр дадаў, што «сёння, падчас новага экзамена на грамадскую сталасць народа, мы павінны знайсці ў сабе сілы паказаць, што нас таксама аб’ядноўвае супольны клопат пра будучыню агульнай Бацькаўшчыны».
Related items
- Пад'ём у 3:30, маўчанне і ніякіх гаджэтаў. Адзіны ў свеце беларус камельдул наведаў родны горад
- Ці ўступаць у піянеры, спыталі ў вернікаў – частка адказаў здзівіла
- «Пад зямлёй адчула сябе шчаслівай». Беларуска працуе ў шахце і запрашае туды на Імшу
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Мілыя фота з жывёламі ў Баранавічах выклалі манаскія асобы