Пачынаецца новы этап рэканструкцыі Чырвонага касцёла ў Мінску. Пра што гэта сведчыць?

Аб ходзе работ па рэканструкцыі Чырвонага касцёла ў Мінску публічнай інфармацыі няма, але мы знайшлі дадзеныя, па якіх можна зрабіць пэўныя высновы. Уласнік будынку, дзяржпрадпрыемства «Мінская спадчына» размясціла аб'яву на сэрвісе закупак аб набыцці абсталявання: прытокава-выцяжных сістэм і блокавага цеплавога пункту.

Мантаж такога абсталявання звычайна адносіцца да этапу інжынернага аздаблення будынку. Пасля гэтага адбываецца пусканаладка інжынерных сістэм, аздобныя працы, рэстаўрацыя інтэр'ераў, добраўпарадкаванне тэрыторыі і ўвод аб'екта ў эксплуатацыю.

Таму гэтыя закупкі сведчаць аб пераходзе да інжынернага аздаблення будынка – асноўныя будаўнічыя канструкцыі ўжо гатовыя альбо знаходзяцца ў высокай ступені гатоўнасці.

Запланаваны пераход да новага этапу рэканструкцыі – ад будаўніча-рэстаўрацыйных прац да інжынернага аздаблення – паказвае на прагрэс. А што па тэрмінах?

Абсталяванне, пра якое ідзе гаворка, павінна быць пастаўлена да канца кастрычніка. Яго мантаж, пусканаладка інжынерных сістэм, аздобныя працы, добраўпарадкаванне тэрыторыі здольныя заняць яшчэ некалькі месяцаў.

Паводле графіка, увод аб'екта ў эксплуатацыю запланаваны на студзень 2027 года. Тэарэтычна, будаўнікі могуць укласціся ў адведзеныя тэрміны, але варта быць гатовымі да таго, што гэтыя тэрміны могуць быць зрушаныя.

Нагадаем, галоўным застаецца пытанне, ці пусцяць у храм парафію святога Сымона і святой Алены і на якіх умовах. Вернікі працягваюць малітву аб тым, каб як мага хутчэй парафія змагла вярнуцца ў Чырвоны касцёл.

Наш канал в Telegram – только интересное и важное. Подписаться >