Гран-пры фестываля «Magnificat» заваяваў чэшскі фільм пра Кірыла і Мятода

Верасень 3, 2015
Written by katolik-gomel.by
Published in Царква
Add new comment

У прызёрах - беларускія, расійскія, польская стужкі.

Фільм «Кірыл і Мятод» чэшскіх рэжысёраў Атакара Шмідта і Яны Струднічкавай заваяваў Гран-пры XI Міжнароднага каталіцкага фестываля хрысціянскіх фільмаў і тэлепраграм «Magnificat».

Стваральнікі фільма на падставе гістарычных фактаў дэтальна паказалі жыццё двух апосталаў, іх значэнне для славян і місійную дзейнасць. Аўтары не пакінулі па-за ўвагай і спадчыну, уплыў і распаўсюджванне кірыла-мятодаўскіх традыцый пасля смерці братоў.

Прыз журы за лепшы дакументальны фільм атрымала стужка «Два Андрэі» беларускай студыі «Студия во имя святого Иоанна Воина». Лепшай тэлепраграмай стала праграма «Другі» студыі «Фишка-фильм» з Расіі.

Дакументальны фільм «Ёанна» (Wajda Studio, Польшча) быў адзначаны як фільм з лепшай рэжысурай, а фільм «Сны» беларускай вытворчасці перамог як лепшы дэбют. Лепшую анімацыю адзначылі ў фільме «Воўк і савяня» беларускай студыі «Студия во имя святого Иоанна Воина».

Прыз глядацкіх сімпатый атрымаў анімацыйны фільм «Заступніца» («Балтийское телевидение», Расія).

«Каб усе былі адно»

На закрыцці XI фестываля «Magnificat» было адзначана, што за 11 гадоў у фестывалі прынялі ўдзел стужкі больш чым з 30 краін свету.

Старшыня журы фестываля Крыстына Лялько звярнула ўвагу на важнасць дэвізу, пад якім «Magnificat» працуе ўвесь гэты час, — «Ut unum sint» (Каб усе былі адно): «Дэвіз вельмі актуальны, бо сёння ў свеце назіраецца асабліва цяжкая сітуацыя з хрысціянствам. І ў гэтых умовах хрысціяне павінны кансалідавацца, фестываль спрыяе ў гэтым яднанні».

Сatholic.by

Last modified onЧацвер, 03 Верасень 2015 17:27

Tagged under