З авацыямі і падарункамі праводзілі ў Мінску пробашча катэдральнага касцёла

На нядзельнай святой Імшы 16 ліпеня парафія мінскага катэдральнага касцёла Імя Найсвяцейшай Панны Марыі развіталася са сваім шматгадовым пробашчам ксяндзом канонікам Антоніем Клімантовічам. У цэлым ён служыў у архікатэдры на розных пасадах каля 25 гадоў.

Паводле рашэння Мітрапаліта Мінска-Магілёўскага арцыбіскупа Юзафа Станеўскага, ксёндз Антоній быў звольнены з пасады пробашча катэдральнай парафіі і прызначаны пробашчам парафіі ў горадзе Заслаўе. Гэта адбылося неўзабаве пасля таго, як прапагандысцкія рэсурсы распаўсюдзілі звесткі з дыскрэдытацыяй святара і лексікай нецярпімасці паводле палітычных матываў.

Урачыстую святую Імшу цэлебраваў сам Мітрапаліт – ён асабіста падзякаваў ксяндзу Антонію за служэнне, па-братэрску абняў яго і пажадаў далейшай плённай працы на карысць збаўлення душаў і асабістага шляху да Бога. Сам ксёндз Антоній таксама выказаў падзяку і давер Божаму Провіду, разуменне патрэбы прыняцця Божай волі з пакорай.

Авацыі і цёплыя словы ў адрас пробашча гучалі ад парафіянаў, яны падрыхтавалі для яго букеты кветак і іншыя падарункі, а моладзь зрабіла незвычайны прэзент – рамку з фотаздымкамі «на сушчы», на якіх перададзены памятныя моманты з удзелам ксяндза Антонія.

У наступную нядзелю катэдральная парафія будзе сустракаць новага пробашча – ксяндза каноніка Дзмітрыя Пухальскага, які дагэтуль служыў у Заслаўі.

Фота: Віктар Ведзень, скрыншоты  трансляцыі @ArchikatedraMinsk, відэа – instagram.com/moladz_katedra