Упершыню малітва аб адзінстве хрысціян прайшла не ў Мінску – гэта не выпадковасць

Падчас Тыдня малітваў аб адзінстве хрысціянаў 19 студзеня ў касцёле ў Заслаўі прайшло экуменічнае набажэнства. Яго ўзначаліў арцыбіскуп эмэрыт Тадэвуш Кандрусевіч. На малітву запрасілі прадстаўнікоў іншых канфесій, каб «сумесна маліцца аб дары адзінства і супрацоўніцтва, каб быць разам перад сучаснымі выклікамі свету і несці дух салідарнасці і надзеі ўсяму беларускаму грамадству».

На набажэнстве ў Заслаўі таксама прысутнічаў Часовы павераны ў справах Святога Пасаду ў Беларусі ксёндз Кшыштаф Сэрока.

У міжканфесійнай малітве зноў удзельнічаў праваслаўны святар – клірык заслаўскага прыхода БПЦ іерэй Вячаслаў Шафарэнка. Летась экуменічнае набажэнства ў архідыяцэзіі адбывалася без прадстаўніка Праваслаўнай Царквы.

А сёлета міжканфесійная малітва аб адзінстве хрысціян упершыню прайшла не ў Мінску. У катэдральным касцёле сталіцы такое мерапрыемства не запланавана. Стала вядома, чаму.

З гэтага года арганізатары вырашылі праводзіць экуменічнае набажэнства ў розных парафіях архідыяцэзіі, каб уключыць іх у гэту ініцыятыву. З надзеяй, што міжканфесійная малітва стане добрай традыцыяй і справай не толькі Мінска, але ўсёй архідыяцэзіі.

У Гродзенскай дыяцэзіі такіх змен пакуль няма – традыцыйнае экуменічнае набажэнства запланавана на 25 студзеня ў катэдральным касцёле.

Наш канал в Telegram – только интересное и важное. Подписаться >