Будслаў-2026: калі будзе фэст, праграма, асаблівасці

Праграму каталіцкага фэсту ў Будславе, які пройдзе 3-4 ліпеня 2026 года пад дэвізам «Богу хвала — Марыі давер — Касцёлу вернасць», апублікаваў Нацыянальны санктуарый.

Праграма істотна не адрозніваецца ад тых, што былі ў мінулыя гады, аднак мае свае асаблівасці. Традыцыйна ў пятніцу, 3 ліпеня, у 23.30 адбудзецца ўрачыстая працэсія з абразом Маці Божай Будслаўскай і свечкамі. Апоўначы пачнецца святая Імша.

У суботу, 4 ліпеня, у 11.30 запланавана галоўная ўрачыстая святая Імша. Падчас гэтай службы адбудзецца прысвячэнне Каталіцкай царквы ў Беларусі Найдаражэйшай Крыві Хрыста – з нагоды 35-годдзя аднаўлення структур КЦ у Беларусі.

Яшчэ адной асаблівасцю стане прэзентацыя першага агульнабеларускага афіцыйнага каталіцкага спеўніка, а таксама – аднаўленне шлюбных абяцанняў пар, якія вянчаліся ў 1991 годзе і цяпер адзначаюць 35-годдзе шлюбу.

Таксама праграма ўключае разважанні і малітвы праз заступніцтва святога Францішка з нагоды 800-годдзя яго смерці, то бок нараджэння для Неба.

Падрабязную праграму глядзіце ніжэй у тэкставым варыянце і на плакаце.

Наш канал в Telegram – только интересное и важное. Подписаться >

Праграма фэсту

3 ліпеня (пятніца)

• 14.00-17.00 — сустрэча і прывітанне пілігрымаў,
• 18.00 — святая Імша з удзелам пілігрымаў,
• 20.00 — Акафіст у выкананні хору Грэка-каталіцкай Царквы,
• 20.30 — Марыйныя нешпары,
• 21.00 — Крыжовы шлях,
• 22.00 — Моладзевая праграма: «Моладзь да моладзі са святым Францішкам Асізскім»,
• 23.30 — Працэсія з копіяй абраза Маці Божай Будслаўскай.

4 ліпеня (субота)

• 0.00 — святая Імша,
• 2.00 — адарацыя Найсвяцейшага Сакрамэнту,
• 6.00 — Боская літургія Грэка-каталіцкай Царквы пры галоўным алтары святыні,
• 7.00 — Гадзінкі аб Беззаганным Зачацці Найсвяцейшай Панны Марыі,
• 8.00 — святая Імша ў базыліцы,
• 9.00 — Фацімскі ружанец,
• 9.45 — Прэзентацыя першага агульнабеларускага афіцыйнага каталіцкага спеўніка «Божа, мы Цябе ўслаўляем» — дар Касцёлу да 35-годдзя аднаўлення яго структур,
• 10.30 — аднаўленне сужэнскіх абяцанняў з нагоды 35-годдзя шлюбу (1991 год),
• 11.30 — святая Імша,
• Акт прысвячэння Найдаражэйшай Крыві Пана нашага Езуса Хрыста Мінска-Магілёўскай мітраполіі,
• Эўхарыстычная працэсія.

На працягу ўсяго фэсту будзе магчымасць ушанавання вернікамі цудадзейнага абраза Маці Божай Будслаўскай і малітвы перад ім.