Хрыстос уваскрос - каб вывесці цябе са смерці! ФОТА ўсяночнай з касцёла

У ноч на 16 красавіка каля 2,3 млрд. хрысціянаў ва ўсім свеце, у тым ліку каля 1,3 млрд. католікаў святкуюць Пасху - Уваскрасенне Госпада Ісуса Хрыста. У ноч на нядзелю вернікі сабраліся ў святынях, каб сустрэць гэты вялікі пераход ад смерці да жыцця. Многія прыйшлі ў гэтую ноч з дзецьмі, бо перадаць сваю веру дзецям - гэта абавязак кожнага хрысціяніна. І некаторыя абрады адмыслова праводзіліся менавіта для маленькіх вернікаў.

Пачалася ўсяночная з Літургіі святла: каб дзецям было прасцей зразумець сэнс Уваскрасення Хрыстовага, які перавёў людзей ад смерці да жыцця, ад цемры да святла. Вернікі пачулі дзевяць чытанняў: пра стварэнне свету, пра айца веры - Абрагама, пра зыход габрэяў з егіпецкага рабства, а таксама Слова Божае, дадзенае праз прарокаў і апосталаў, Евангелле пра Уваскрасенне Езуса.

Перад кожным чытаннем дарослыя звярталіся да дзяцей, тлумачачы, пра што зараз будзе гаварыць Бог, запрашалі слухаць Яго Слова. Каб дапамагчы дзецям не спаць, іх сабралі перад алтаром выканаць песню аб тым, чаму ў гэтую ноч яны не спяць.

- Кожнага з нас сёння Хрыстос хоча вывесці з рабства нашага граху і адарыць сваёй любоўю. І ты ніколі не зможаш любіць нікога - сваіх дзяцей, сваю жонку, нават другую, трэцюю, пятую - калі спачатку не палюбіш Хрыста. Толькі Ён, Які памёр за грэшнікаў, дае нам любоў да грэшнікаў, якімі мы ўсе з'яўляемся. Пан Езус для кожнага з нас сёння хоча зрабіць гэты цуд уаскрасення. Нам жа засталося толькі адкрыць свае сэрцы і сказаць: «Хачу! Уваскрасі мяне там, дзе я мёртвы ». Калі сямейны - каб уваскрос у сваім шлюбе, калі алкаголік - каб уваскрос для жыцця ў цвярозасці, каб сужэнцы уваскрэслі для новага жыцця, каб прымаць дзяцей, калі дзіця - то каб уваскрос у паслухмянстве бацькам, калі працуеш - каб уваскрос у сваёй рабоце, каб працаваў сумленна не дзеля грошай, а для славы Божай. І ва ўсіх іншых момантах - прасі, каб Гасподзь сёння уваскрэсіў цябе! - заклікае пробашч парафіі айцец Славамір. - Толькі Ісус Уваскрослы можа выратаваць цябе ад тваіх грахоў: твайго алкагалізму, тваёй нявернасці, хлусні, ляноты, эгаізму. Табе трэба толькі запрасіць Яго ў сваё жыццё, і Ён уваскрэсіць цябе.

Завяршылася начное чуванне Хросным ходам пад гук званоў. Святочныя святыя Імшы працягваюцца ў нядзелю і ўвесь наступны тыдзень.

Падчас Велікодных службаў у гомельскім касцёле здзейснілі сакрамэнт хросту дваіх дзяцей (немаўляці і школьніка) і чацвярых дарослых. Фота будуць апублікаваныя пазней. Глядзіце таксама трансляцыю святой Імшы ў Велікодную нядзелю.