Папа Рымскі прыняў «маральнае рашэнне» прышчапіцца ад СOVID-19

Папа Рымскі Францішак расказаў пра “маральнае рашэнне” прышчапіцца ад каронавіруса, які выклікаў пандэмію. Ён выказаў пажаданне, каб усе прыступілі да вакцынацыі, маючы на ўвазе таксама пашану да жыцця і здароўя іншых людзей. Францішак распавёў, што ўжо запісаўся на вакцынацыю, якая пачнецца ў Ватыкане ў бліжэйшыя тыдні. У гэтым пантыфік прызнаўся ў інтэрв’ю італьянскаму “Canale 5”, якое выйшла ў эфір вечарам 10 студзеня.

Францішак перакананы, што з этычнага пункту гледжання прышчэпку ад каронавіруса павінны зрабіць усе. “Гэта не проста магчымасць, а этычны выбар”, бо ад яго залежыць таксама жыццё іншых людзей. Папа зазначыў, што не разумее “самазабойчага негацыянізму” ў гэтым пытанні.

Святы Айцец прызнаўся, што ў сувязі з існуючымі абмежаваннямі, звязанымі з барацьбой з каронавірусам, адчувае сябе зняволеным. Ён выказаў шкадаванне з-за адмененых падарожжаў і падзяліўся надзеяй на тое, што ў сакавіку зможа наведаць Ірак. Папа распавёў, што цяпер прысвячае больш часу малітве.

Каментуючы сітуацыю, выкліканую пандэміяй, пантыфік заўважыў, што з крызісу немагчыма выйсці не змяніўшыся. “Мы выйдзем з яго лепшымі або горшымі”, таму “неабходна пераглядзець усё”.

Напярэдадні стала вядома, што ў 78-гадовым узросце памёр Фабрыцыа Сакорсі, асабісты ўрач Папы. Медык быў шпіталізаваны ў рымскую клініку Джэмэлі з анкалагічным захворваннем. Смерць наступіла ў выніку ўскладненняў, звязаных з СOVID-19.

Паводле vaticannews.va/be