Дываны ад бабулі ў касцёле і іншыя «скарбы». Падарожніца – пра вёскі на мяжы Беларусі, Літвы і Латвіі

Жыхарка Браслаўскага раёна, каталіцкая верніца Юлія Шакель з'ездзіла ў падарожжа па сваім краі ў пошуках «скарбаў». Пра іх яна распавяла на сваёй старонцы ў сацсетцы. Юлія і раней публікавала справаздачы аб паездках па рэгіёне, фота касцёлаў і іншых цікавостак. А гэтым разам адправілася ў вёскі Дрысвяты і Опса, якія знаходзяцца на стыку межаў Беларусі, Літвы і Латвіі.

Першы «скарб» – гэта парафіянка рыма-каталіцкай парафіі ў вёсцы Дрысвяты Вольга Любінская:

«Яна складае ў касцёле Святых Пятра і Паўла кветкавыя кампазіцыі ля алтароў з простых раслін з ваколіц сваёй вёскі. Яна ўмела выкарыстоўвае дэкаратыўныя ўласцівасці раслін. Для кожнай травінкі і кветкі знаходзіць сваё месца, і стварае цуд», – напісала Юлія.

Другі «скарб» – гэта кілімы, якія ўпрыгожваюць прыступкі да алтароў у касцёле Святога Яна Хрысціцеля ў вёсцы Опса:

«Спіцамі звязаныя па ўзоры стужкі і пашытыя ў адно палатно. Глядзяцца вельмі сімпатычна. Майстрыхі няма ўжо ў жывых, яна была мясцовай парафіянкай. Яе дачка прынесла ў касцёл гэтыя кілімкі і цяпер у памяць аб гэтай жанчыне перыядычна іх выкарыстоўваюць. Па нашай мясцовасці ў побыце я не бачыла каб карысталіся такімі вырабамі. Гэтыя раслінныя ўзоры і яркія спалучэння нітак нагадваюць маляванку».

Юлія абяцала працягнуць свой аповед.

Наш канал в Telegram – только интересное и важное. Подписаться >