Імша пры свячах, два дні без вады: як вернікі Палесся перажылі надзвычайную сітуацыю

Пасля таго, як 16 ліпеня з'явілася сувязь з пацярпелымі ад буры раёнамі Гомельшчыны, даведаліся, як надзвычайную сітуацыю перажылі мясцовыя вернікі. Амаль двое сутак у Мазырскім, Калінкавіцкім, Нараўлянскім, Ельскім, Лельчыцкім раёнах не было электрычнасці і водазабеспячэння.

Ураганны вецер не закрануў святыні. Толькі ў Светлагорску, па папярэдніх звестках, было невялікае пашкоджанне вежы. Нагадаем, увечары 14 ліпеня над Гомельшчынай пранеслася бура, якая прынесла разбурэнні і нават смерці, завалы на дарогах, пашкодзіла высакавольтную лінію электраперадач, з-за чаго знікла электрычнасць, сувязь, водазабеспячэнне.

«Толькі ў аўторак з раніцы часткова з’явілася сувязь, і то не ўсюды. У нядзелю Імшы ўсюды прайшлі да поўдня ў звычайным рытме. Толькі ў Петрыкаве ўвечары нядзельная Імша была пры свячах», – распавялі з месцаў.

Паводле вернікаў, «перыяд без электрычнасці, вады, сувязі – цяжкі перыяд, незвычайны і нечаканы»:

«Прывыклі да тога ці іншага камфорту. Молімся за ўсіх, каго закрануў гэты ўраган і за тых, хто прыкладае свае намаганні, каб як мага хутчэй усё стала на свае месцы».

Адна з верніц падзялілася ўласнай праблемай – з-за таго, што не было святла, размарозілася лядоўня, таму прапалі прадукты і назбіраныя замарожаныя ягады:

«Вельмі шкада – але, нічога, абыдземся. Самае цяжкае было быць без вады. Некаторыя ўмудраліся прадаваць ваду – нам даводзілася купляць. У іншых месцах былі вельмі вялікія чэргі за бясплатнай вадой. Не маглі дазваніцца да блізкіх. Але галоўнае, што ўсё абышлося – дзякуй Богу».

Наш канал в Telegram – только интересное и важное. Подписаться >