Паступіла пяць прапаноў: чым скончылася абмеркаванне рэканструкцыі мінскай Кальварыі

Адміністрацыя Фрунзенскага раёна Мінска апублікавала пратакол падвядзення вынікаў грамадскага абмеркавання архітэктурна-планіровачнай канцэпцыі рэканструкцыі каталіцкага храма Узвышэння Святога Крыжа, пахавальняў і брамы на Кальварыйскіх могілках. Пратакол датаваны яшчэ 1 сакавіка, а калі ён быў апублікаваны, не пазначана.

У дакуменце гаворыцца, што чатыры заяўнікі ўнеслі заўвагі і прапановы. Яны пералічаны ў пратаколе:

— Захаваць пры рэканструкцыі першапачатковы выгляд будынкаў, не выкарыстоўваць навадзел, у прыватнасці, пластык, а таксама захаваць зялёную зону, старыя і новыя дрэвы.

— На таблічцы ўваходнай брамы выправіць дзве памылкі.

— Пытанне аб захаванні мемарыяльнай дошкі, адноўленай у 2021 годзе, прысвечанай мастаку Яну Дамелю.

— Пытанне аб аднаўленні астатніх мемарыяльных дошак, якія раней знаходзіліся ў касцёле.

— Пытанне аб распрацоўцы праектных рашэнняў аб'екта з улікам архіўнага апісання дзвярэй, вокнаў і праёмаў касцёла.

Першы і пяты пункты архітэктурна-горадабудаўнічы савет рэкамендаваў ўлічыць пры далейшым праектаванні. Мемарыяльную дошку, прысвечаную мастаку Яну Дамелю, захаваюць. Астатнія заўвагі адхіленыя, паколькі «не з'яўляюцца прадметам праектавання». У выніку савет рэкамендаваў праект да зацвярджэння.

Нагадаем, у інвестыцыйнай праграме Мінска мы знайшлі звесткі аб тым, што ў 2024 годзе на рэалізацыю гэтага праекта прадугледжана выдзяленне 200 тыс. рублёў, а ў 2025 годзе — 762 тыс. рублёў. Можна меркаваць, што асноўныя працы пачнуцца ў наступным годзе, і чакаць, зыходзячы з маштабу праекта, што дзейнасць парафіі Узвышэння Святога Крыжа на час работ у касцёле можа быць прыпыненая.

Наш канал в Telegram – только интересное и важное. Подписаться >