Біскуп Касабуцкі павіншаваў праваслаўных з пачаткам Вялікага посту і папрасіў прабачэння

З 15 сакавіка ў вернікаў Праваслаўнай царквы пачынаецца Вялікі пост - асаблівы час навяртання да Бога і падрыхтоўкі да свята Ўваскрасення Хрыстовага. Гэты перыяд працягнецца да 2 траўня, калі праваслаўныя адзначаць Вялікдзень. Нагадаем, католікі ўжо перажываюць Вялікі пост з 17 лютага.

Беларускі каталіцкі біскуп Юрый Касабуцкі апублікаваў на сваёй старонцы ў Фэйсбуку допіс з нагоды пачатку Вялікага посту ў праваслаўных:

- Усіх глыбокапаважаных праваслаўных вернікаў віншую з пачаткам Вялікага посту. Прабачальная Нядзеля (Прощённое воскресенье) мае вялікі сэнс у жыцці кожнага хрысціяніна. Прабачэнне - гэта неад'емная частка нашага жыцця. Я хачу папрасіць прабачэння, калі кагосьці пакрыўдзіў, камусьці, можа, не хапіла маёй увагі, хтосьці застаўся незадаволены ў вырашэнні яго справаў... Прашу прабачэння за ўсе мае чалавечыя слабасці... І хачу падзяліцца відэа пропаведзі вельмі паважанага мною архіепіскапа Гродзенскага і Ваўкавыскага ўладыкі Арцемія.