Рэкордная колькасць хлопцаў залічана сёлета ў каталіцкую семінарыю ў Беларусі

У Міждыяцэзіяльнай вышэйшай духоўнай семінарыі ў Гродне – адзіным у Беларусі вну, якое рыхтуе каталіцкіх святароў – 12 жніўня адбыўся ўступны іспыт. Пра яго вынікі афіцыйна пакуль не паведамляецца, аднак па апублікаваным здымку можна зрабіць выснову, што ў семінарыю прынятыя 11 новых студэнтаў.

Гэта – чарговы рэкорд апошніх гадоў. Нагадаем, летась у семінарыю былі залічаны 10 абітурыентаў – той год стаў прарыўным. А годам раней жаданне стаць святарамі выказалі ўсяго чатыры хлопцы.

Цяпер, па інфармацыі Івейскага дэканату, які апублікаваў здымак біскупа Гродзенскага з новымі семінарыстамі, сярод залічаных студэнтаў – адзін малады вернік з парафіі святых апосталаў Пятра і Паўла ў Іўі.

Семінарыя выклала фота з іспыту, а біскупы распавялі пра яшчэ трох новых студэнтаў – яны з усходняй часткі Беларусі, што асабліва каштоўна. Упершыню за многія гады кандыдаты на святарства з'явіліся ў Гомелі – адтуль прыехалі паступаць у семінарыю два хлопцы, паведаміў біскуп Андрэй Зноска.

Яшчэ адзін новы семінарыст – з Бабруйску, распавёў біскуп Аляксандр Яшэўскі. Іерарх папрасіў усіх аб малітве за кандыдатаў на святарства, каб яны пратрымаліся да канца ў сваім пакліканні служыць Богу і людзям.

Наш канал в Telegram – только интересное и важное. Подписаться >