Гомельскія каталікі вярнуліся з Еўрапейскай сустрэчы моладзі ў Рыме

У Рыме гомельскую групу падзялілі. Усе жылі ў розных канцах горада. Многіх пасялілі ў школе і манастыры, спалі ў паходных умовах. Удзень надвор'е было дзівосным, але ўначы было вельмі халодна. Некаторыя захварэлі літаральна на другі дзень. Але гэтыя выпрабаванні былі неабходныя, каб кожны змог адчуць, што ён сапраўды ў пілігрымцы, дзе можа не быць гарачай вады, добрай ежы і ўмоваў.

Аднак малітва з Папам Бэнэдыктам XVI, якога паломнікі бачылі на адлегласці аднаго метра, калі ён праязджаў па плошчы св. Пятра, пакрылі ўсе цяжкасці паломніцтва. У моладзі была магчымасць бачыць на ўласныя вочы гістарычныя месцы Рыма, славутасці сусветнага значэння, катакомбы першых хрысціян. Малітвы былі арганізаваны ў розных базыліках і касцёлах, чытанні й малітвы здзяйсняліся на розных мовах.

31 снежня дзве групы святкавалі Эўхарыстыю разам з Нэакатэхуменальнай суполкай, а затым было арганізавана свята нацый, у якім кожная краіна магла сябе прадставіць. А ў трэцяй групы прадставілася магчымасць на Набажэнстве 1 студзеня маліцца разам з усімі псальмамі на рускай і італьянскай мовах. Моладзь Тэзэ выдатна спявала разам з гомельцамі і пляскала ў далоні. Гэта быў цуд Святога Духа, які ўсіх аб'ядноўваў і напаўняў сэрца радасцю.

Затым, пасля Рыма, наступны прыпынак быў у Любліне 3 студзеня, дзе гомельцаў таксама прымалі сем'і з Нэакатэхуменату. 4 студзеня ксёндз Дамінік арганізаваў экскурсію па старым горадзе і паход у семінарыю.

Заключнай ноткай паломніцтва была Эўхарыстыя ў Брэсце, дзе моладзь магла выказаць свой досвед і падзяліцца ўражаннямі. І 6 студзеня рана раніцай моладзь вярнулася дадому, напоўненая Духам і радасцю.